ഭുവനേശ്വർ: ബംഗാൾ ഉൾക്കടലിൽ രൂപംകൊണ്ട അക്വാൻ ചുഴലിക്കാറ്റ് വെള്ളിയാഴ്ച രാവിലെ ഒഡീഷയിലെ ഗോപാൽപൂരിന് സമീപം തീരം തൊട്ടു. ചുഴലിക്കാറ്റിന്റെ സ്വാധീനത്തിൽ തീരദേശ, ദക്ഷിണ ഒഡീഷ മേഖലകളിൽ അതിശക്തമായ മഴയും കാറ്റും അനുഭവപ്പെട്ടു. മണിക്കൂറിൽ 70–80 കിലോമീറ്റർ വേഗത്തിൽ വീശിയ കാറ്റിന്റെ വേഗം ചിലയിടങ്ങളിൽ 90 കിലോമീറ്റർ വരെയെത്തി. ഗഞ്ചാം ജില്ലയിലെ പത്രാപൂരിൽ 209 മില്ലിമീറ്റർ മഴ രേഖപ്പെടുത്തി. ഹിൻജിലിയിൽ 207 മില്ലിമീറ്ററും ചികിറ്റിയിൽ 199 മില്ലിമീറ്ററും ഗോപാൽപൂരിൽ 190 മില്ലിമീറ്ററും മഴ ലഭിച്ചു.
ചുഴലിക്കാറ്റിന്റെ മുന്നറിയിപ്പിനെ തുടർന്ന് ഒഡീഷയിലെ 20 ജില്ലകളിൽ നിന്നായി 3.72 ലക്ഷത്തിലധികം പേരെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചു. ഗർഭിണികളെയും പ്രത്യേക പരിചരണം ആവശ്യമുള്ളവരെയും സുരക്ഷിത കേന്ദ്രങ്ങളിലേക്കും ആശുപത്രികളിലേക്കും മാറ്റി.

ശക്തമായ മഴയെ തുടർന്ന് ബെർഹാംപൂർ, ദിഗപഹണ്ടി തുടങ്ങിയ നഗരങ്ങളിൽ വെള്ളക്കെട്ടുണ്ടായി. മുൻകരുതൽ നടപടിയുടെ ഭാഗമായി 41-ലധികം ട്രെയിനുകൾ റദ്ദാക്കുകയും ചില വിമാന സർവീസുകൾ നിർത്തിവയ്ക്കുകയും ചെയ്തു. അതേസമയം, ഇതുവരെ ആളപായമോ വലിയ തോതിലുള്ള അടിസ്ഥാന സൗകര്യ നാശനഷ്ടങ്ങളോ റിപ്പോർട്ട് ചെയ്തിട്ടില്ലെന്ന് അധികൃതർ അറിയിച്ചു.